💫தீபாவளி💫

💫Deepawali(தீபாவளி) vs Dewali(தீவாளி)

இரண்டிற்கும் வேறுபாடு தெரியாமல் நேற்றுப் பலரும் வாழ்த்துக்களைப் பகிர்ந்ததை பார்க்கும் போது மனது வலித்தது. நாம் கொண்டாடும் தீபாவளி பண்டிகை அன்றுதான்  இந்தியாவின் வடபகுதியில் தீவளி அல்லது தீவாளி என்ற பண்டிகையும் கொண்டாடப்படுகிறது. இது கூடத் திட்டமிட்ட ஒரு செயலாகவும் இருக்கலாம். தீவளி என்பதற்கும் தீவாளி என்பதற்கும் வேற்றுமை மிகச் சிறியதாகும். ஆனால் தீபாவளிக்கும் தீவாளிக்கும் எந்தத் தொடர்புமில்லை என்பது பலருக்குத் தெரியவில்லை என்றே தோன்றுகிறது. தீபாவளி என்பது என்னவென்றால், தீ என்பது நெருப்பு. பா-வினைச்சொல் பரவுதல். வளி - காற்று.  இது தீ பரவும் காற்று என்று பொருள் தருகிறது. இது வினைத்தொகை, இதில் ஐந்து பூதங்களில் இரண்டு தரப்பட்டு ஒரு சொல்லாகியுள்ளது.  ஆகவே தீபாவளி என்பது இயற்கை  ஆற்றல்களுக்கு எடுக்கப்படும் ஒரு விழா  என்றும் பொருள் கூற வேண்டியுள்ளது. புரியும்படி கூறுவதென்றால் அக்கினி பகவானுக்கும், வாயு பகவானுக்கும் எடுக்கும் விழா ஆகிறது. தீக்கெல்லாம் மூலமாவது சூரியன் அது சூரியனையும் உள்ளடக்கும். தீபத்தையும் உள்ளடக்கும். தீயைப் பரப்பும் காற்றும் அதில் அடங்கிவிடும்.

தீபாவளிக்கு எண்ணிறந்த விளக்கங்கள் உள்ளன. மிகப் பழங்காலத்தில் அக புற இருள் அகற்றி எங்கும் ஒளிமயமாக திகழ தீப ஒளியாக தீபாவளி கொண்டாடப்பட்டது, தீபங்களின் வரிசை அல்லது நிரல் தீப ஆவலி என்னும் நாட்டியமாகவும் அது கொண்டாடப்பட்டது. இயற்கையை வழிபட்ட விழாவாகவும், எண்ணெய்க் குளியல் செய்து, எங்கள் முன்னோர்களை வணங்கி அவர்களுக்குப் பிடித்த உணவுகளை ஆக்கிப் படைத்த விழாவாகவும் கொண்டாடப்பட்டது அதனை தென்புலத்தார் வழிபாடு என்றும் அழைப்பார். இன்றும் இந்தியாவின் தெற்கிலும், மற்றும் எங்களின் இனங்கள் செறிந்து வாழும்  இடமெங்கிலும் இவ்வாறே கொண்டாடப்படுகிறது. எங்கள் வீடுகளிலும் இதுவே காலங் காலமாக பின்பற்றப்படுகிறது.

நரகாசுரன் வதம் தானே தீபாவளி என்று நீங்கள் நினைக்கலாம். சிறுவயதில் படித்தும் இருக்கலாம். இந்து தொன்மவியலின்படி திருமாலின் வராக அவதாரத்திற்கும், பூமாதேவிக்கும் பிறந்தவர் நரகாசுரன் ஆவார். இவர் தன்னுடைய பெற்றோர்களால் தான் மரணம் ஏற்பட வேண்டும் என்ற வரம் வாங்கியதாகவும், அதன் காரணமாக திருமாலின் கிருஷ்ண அவதாரத்தில் பூமாதேவி சத்தியபாமாவாக பிறந்து நரகாசுரனைக் கொன்றதாகவும் நம்பிக்கை நிலவுகிறது. இந்த வரலாறு இடைச்செறுகல் தான். ஆரியர்களின் வழி வந்தவைகளில் இதுவும் ஒன்று என்பது தெட்டத் தெளிவு.

வட இந்தியர்களால் கொண்டாடப்படும் தீவாளி என்பது இராமன் இராவணேசுவரனை வெற்றி கொண்டதையும், இராமன் பதினான்கு ஆண்டுகள் காட்டில் இருந்துவிட்டு நாட்டுக்கு வந்ததையும், சீதையின் அக்கினி நிகழ்வையும் நினைவு கூர்ந்தே நடக்கிறது. இவர்களின் தீவாளிக்கும் எமக்கும் எந்தத் தொடர்பும் இல்லை. இனியாவது எமது மதிப்புமிக்க வரலாற்றைத் தெரிந்து கொண்டு பண்டிகைகளைக் கொண்டாடி மகிழ்வோம், எமது அடுத்த சந்ததியினருக்கும் இதைக் கொண்டு செல்வோம். எங்களின் பண்டிகைகள் இயற்கையுடன் இணைந்தவை. யாரையும் வெற்றி கொண்டோ, அல்லற்ப் படுத்தியோ கொண்டாடுபவை அல்ல. சிங்கப்பூரில் எனது பிள்ளைகள் எமது வரலாற்றை தமது ஏட்டுக் கல்வியில் தெரிந்து வைத்து பண்டிகைகளைக் கொண்டாடி மகிழ்கின்றனர் என்று கூறுவதில் மகிழ்ச்சியாகவுள்ளது.